टोकियो । गैरआवासीय नेपाली संघ (एनआरएनए) जापानको प्रवक्तामा पत्रकार सचिन आचार्य चयन भएका छन्। एनआरएनए जापानको कार्यसमितिको निर्णयअनुसार आचार्यलाई प्रवक्ताको जिम्मेवारी प्रदान गरिएको हो।
पत्रकारिता तथा सामाजिक क्षेत्रमा सक्रिय आचार्यले जापानस्थित नेपाली समुदायका विविध गतिविधि, समस्या तथा सरोकारका विषयलाई निरन्तर रूपमा उजागर गर्दै आएका छन्। उनलाई प्रवक्ताको जिम्मेवारी दिइनु संगठन र सञ्चार क्षेत्रबीचको समन्वयलाई अझ प्रभावकारी बनाउने अपेक्षा गरिएको छ।
नवनियुक्त प्रवक्ता आचार्यले संगठनका गतिविधि, योजना तथा निर्णयहरूलाई पारदर्शी र प्रभावकारी रूपमा समुदायसम्म पुर्याउने प्रतिबद्धता व्यक्त गरेका छन्। साथै, जापानमा रहेका नेपाली समुदायका हितका विषयमा संगठन र सञ्चारमाध्यमबीच सहकार्यलाई थप मजबुत बनाउने उनको भनाइ छ।
हाल एनआरएनए जापानको अध्यक्षमा सुभाष लामिछाने रहेका छन्। एनआरएनए जापानले जापानमा बसोबास गर्ने नेपालीहरूको हकहित, सहयोग तथा समुदायिक एकताका लागि विभिन्न कार्यक्रम सञ्चालन गर्दै आएको छ।
यसअघि प्रवक्ता रहेका साहित्यकार रविन शर्मा अमेरिका प्रस्थान गरेकोले आचार्यलाई प्रवक्ताको जिम्मेवारी तोकेको एनआरएनए जापानले जनाएको छ ।
