काठमाडौं,२३ माघ । कलाकार दम्पत्ति सीताराम कट्टेल र कुञ्जना घिमिरेको चौथो परियोजनाका रुपमा रौतहटको सन्तपुर एकीकृत नमूना बस्ती हस्तान्तरण गरिने भएको छ ।
आज मंगलबार धुर्मुस–सुन्तली फाउण्डेसनद्वारा निर्मित सो बस्ती राष्ट्रपति विद्यादेवी भण्डारी द्धारा हस्तान्तरण गरिने भएको हो । रौतहटको चन्द्रपुर नगरपालिका वडा नं ८ सन्तपुरमा बाढीपीडित दलित परिवारका लागि निर्माण गरिएको भूकम्प प्रतिरोधात्मक सुविधा सम्पन्न ४७ वटा घर निर्माण भइसकेकाले एक् कार्यक्रममा हस्तान्तरण गर्न लागिएको हो ।
गत असोज ४ गते शिलान्यास गरिएको सो नमूना बस्तीमा सामुदायिक भवन, मन्दिर, क्लबघर, भ्यू टावर समेत निर्माण भएका छन् । गत साउनमा आएको बाढीले सो गाउँका दलित परिवारको घर डुबानमा परेपछि धुर्मुस–सुन्तलीको पहलमा सुविधा सम्पन्न घर बनाइएको हो । करिब रु पाँच करोड ९६ लाखको लागतमा निर्माण भएको सो बस्ती कलाकार धुर्मुस दिनरात आफैँ खटेर काम गर्दै आउनुभएको थियो ।
यो एकीकृत नमूना बस्ती अपांगतामैत्री, बालमैत्री, वातावरणमैत्री संरचनाअनुसार निर्माण भएको फाउण्डेशनका अध्यक्ष तथा कलाकार धुर्मसले बताउनुभयो ।
यो जोडीले भूकम्प पीडितका लागि काभ्रे र सिन्धुपाल्चोकमा एकीकृत नमूना बस्ती, महोत्तरीको बर्दिबासमा मुसहरका लागि एकीकृत नमूना बस्ती बनाइसकेको छ ।
