काठमाडौँ । प्रधानमन्त्री केपी शर्मा ओलीले पूर्वप्रधानमन्त्री बाबुराम भट्टराईको अभिव्यक्तिप्रति लक्षित गर्दै बूढीगण्डकीमा अर्बौं भ्रष्टाचार भयो भन्ने कुरा निराधार भएको बताएका छन् । नेपाल प्रहरीको ६५औं स्थापना दिवसका अवसरमा शुक्रबार प्रहरी प्रधान कार्यालयमा आयोजित कार्यक्रममा प्रधानमन्त्रीले सरकारले भ्रष्टाचारविरुद्ध शून्य सहनशीलताको नीति अपनाएको बताएका हुन् ।
उनले भने, ‘एउटा निर्णय नभएको, कसैले नलिएको कार्यारम्भ नभएको, हुन्छ हुँदैन भन्ने टुंगो नभएको आयोजनामा पूर्वप्रधानमन्त्री र वर्तमान प्रधानमन्त्रीसमेतले यति अर्ब बाँडेर खाए भनेर गैरजिम्मेवार अभिव्यक्ति दिएकोसमेत सुनेको छु, हामी त्यति गैरजिम्मेवार र अनुत्तरदायी हुन सक्दैनौं ।’ बूढीगण्डकी आयोजनामा अर्बौं भ्रष्टाचार भयो भनेर देश र जनतालाई गलत सूचना दिएर भड्काउने कुचेष्टा भएको पनि प्रधानमन्त्री ओलीले बताए । केही दिनअघि पूर्वप्रधानमन्त्री भट्टराईले एउटा कार्यक्रममा प्रधानमन्त्री केपी शर्मा ओली, पूर्वप्रधानमन्त्रीहरु शेरबहादुर देउवा र पुष्पकमल दाहालले ९ अर्ब रुपैयाँ खाएको भनेर विवादित अभिव्यक्ति दिएका थिए । त्यसपछि कांग्रेस र नेकपा दुवैले विज्ञप्ति निकालेर आरोप पुष्टि गर्न भट्टराईलाई चुनौती दिएका थिए । त्यसपछि भट्टराईले भने आफ्नो काम सडकमा प्रमाण देखाउँदै हिँड्ने नभएको उल्लेख गर्दै निष्पक्ष छानबिन गरेर देखाउन सरकारलाई चुनौती दिएका छन् ।
प्रधानमन्त्रीले सरकारले भ्रष्टाचार र अपराधविरुद्ध शून्य सहनशीलताको नीति अपनाएको बताए । नेपालजस्तो मुलुकमा जागिर पाउनु, तलब पाउनु गरिबीको रेखामुनि पर्नु नभएको भन्दै लोभलालच, र व्यक्तिगत लाभ र स्वार्थभन्दा माथि उठेर काम गर्नुपर्ने उनले बताए । आफूहरु सत्य निष्ठा र जिम्मेवारीका साथ मात्र अघि बढ्ने प्रधानमन्त्री ओलीले बताए ।
भ्रष्टाचार र अपराधविरुद्ध शून्य सहनशीलताका साथ अघि बढे पनि अरु कुराहरुमा सरकार सहनशीलताका साथ अघि बढ्ने उनले बताए । अपराध र भ्रष्टाचारविरद्धको शून्य सहनशीलताको नीति अपनाउन नेपाल प्रहरी प्रतिबद्ध भएर अघि बढ्ने कुरामा आफू विश्वस्त रहेको पनि प्रधानमन्त्री ओलीले बताए ।
