काठमाडौं । अनसनरत डा गोविन्द केसीका प्रतिनिधि र सरकारी वार्ता टोलीबीच शुक्रबार राति भएको वार्ता विना निष्कर्ष टुंगिएको छ ।
सम्झौता गरेर आजै अनसन तोडाउने भनिएपछि सरकारी वार्ता टोली बिहीबार तयार पारिएको मस्यौदाबाट झनै पछि हटेकाले वार्ता विना निष्कर्ष टुंगिएको डा. जीवन क्षेत्रीले जानकारी दिएका छन् ।
वार्ता विना निष्कर्ष टुंगिएपछि केसीका समर्थकले शनिबार मध्यान्ह १२ बजे सरकारलाई दबाब दिन माइतीघरमा प्रदर्शन गर्ने र त्यसमा सहभागी हुन सबैलाई आह्वान गरेका छन् ।
२६ दिनदेखि अनसनरत डा. केसीको स्वास्थ्य अवस्था गम्भीर बन्दै गएको छ । डा केसीका मागको सम्बन्धमा सरकारी टोली र केसीका प्रतिनिधिबीच बिहीबारदेखि वार्ता सुरु भएको हो । थप गृहकार्य आवश्यक भएको भन्दै सरकारी पक्ष र डा. केसीका प्रतिनिधिबीच बिहीबार भएको वार्ता शुक्रबार पुनः बस्नेगरि सकिएको थियो ।
केसी अनशन बसेको २४ दिनमा वार्ता टोली गठन गरेर २५ औं दिनमा सरकारले औपचारिक वार्ता सुरु गरेको हो । बुधबार सरकारले शिक्षा, विज्ञान तथा प्रविधि मन्त्रालयका सचिव गोपीनाथ मैनालीको नेतृत्वमा तीन सदस्यीय समिति गठन गरेको थियो । समितिमा स्वास्थ्य तथा जनसंख्या मन्त्रालयका सहसचिव डा. गुणराज लोहनी र चिकित्सा शिक्षा आयोगका निर्देशक दिलिप शर्मा सदस्य छन् ।
केसीको तर्फबाट डा. जीवन क्षेत्रीको संयोजकत्वमा चार सदस्यीय वार्ता टोली गठन भएको थियो । डा केसी वार्ता टोलीको सदस्यमा डा अंजनीकुमार झा, डा. लोचन कार्की र ओमप्रकाश अर्याल सदस्य छन् । भदौ २९ गते जुम्लाको एक धर्मशालाबाट १९ औं अनशन सुरु गरेका केसीलाई असोज ५ गते नेपालगञ्ज ल्याइएको थियो । स्वास्थ्य अवस्था गम्भीर बनेको भन्दै नेपालगञ्जबाट असोज ६ गते काठमाडौं ल्याइएपछि केसी त्रिवि शिक्षण अस्पतालमा अनशनरत छन् ।
