शुक्रबार, फागुन ११, २०८०

एनआरएनए अन्तर्राष्ट्रिय समन्वय परिषदको अध्यक्षमा डा. बद्री केसीको प्यानल विजयी

काठमाडौं । गैरआवासीय नेपाली संघ (एनआरएनए) अन्तर्राष्ट्रिय समन्वय परिषदको अध्यक्ष पदमा डा. बद्री केसी विजयी भएका छन्।

काठमाडौंको सोल्टी होटलमा सम्पन्न एघारौं महाधिवेशन तथा विश्व सम्मेलनबाट अध्यक्ष पदमा केसि १३ सय ७८ मत प्राप्त गरेर बिजयी भएको निर्वाचन समितिले जनाएको छ ।

नेपालमा उपस्थित एनआरएनए डेलीगेट्स तथा अनलाइनका माध्यमबाट बुधवार मध्यरात देखी बिहिबाट मध्यरातसम्म भएको मतदानबाट २०२३-२०२५ कार्यकालका लागि निबर्तमान कार्यसमितिका कार्यकारी अध्यक्ष रहेका केसी पुन अध्यक्षमा निर्वाचित भएका हुन ।

केसीका निकटतम प्रतिद्वन्दी राजेन्द्र कुमार शर्मा आरकेले १२ सय ८१ मत पाएका छन् । यसैगरी निवर्तमान कार्यसमितिका उपाध्यक्ष महेश कुमार श्रेष्ठले १२२५ मत प्राप्त गरेको निर्वाचन समितिले सार्वजनिक मत परिणाममा उल्लेख छ ।
अध्यक्ष पदमा उम्मेदवार दिए पनि अन्तिम समयमा उम्मेदवारी फिर्ता लिएर महेश कुमार श्रेष्ठलाई समर्थन गरेकी रविना थापाको नाममा पनि ४७ मत खसेको छ ।
डा. केसी एमालेनिकट हुन् । निवर्तमान तीन अध्यक्षमध्ये केसी कार्यकारी अधिकारयुक्त थिए । एमालेनिकट प्रवासी नेपाली मञ्चले उनलाई अघि सारेको हो । केसीले व्यवस्थित र सुरक्षित वैदेशिक रोजगारी, नेपालमा लगानी तथा एनआरएनए डेभलपमेन्ट फन्ड तथा गैरआवासीय नेपालीको हक-अधिकारलाई आफ्नो मुख्य एजेन्डा बनाएका थिए ।

महेश कांग्रेसनिकट हुन् । उनी एनआरएनएको निवर्तमान उपाध्यक्ष थिए । कांग्रेसबाट डा. केशव पौडेल पनि अध्यक्षका आकांक्षी थिए । तर, पार्टीका नेताहरुले उनलाई थामथुम गरेर श्रेष्ठलाई अघि सारेका हुन् ।

अर्का प्रत्यासी शर्मालाई माओवादीको आशिर्वाद छ । प्रधानमन्त्री पुष्पकमल दाहाल ‘प्रचण्ड’ ले नै ग्रीन सिग्नल दिएपछि उनी उम्मेदवार बनेका थिए । उनी पनि निवर्तमान उपाध्यक्ष हुन् ।

उपाध्यक्षमा अस्ट्रेलियाबाट डा. विनोद श्रेष्ठ (१५६०), यूकेबाट डा. हेमराज शर्मा (२२६५), मलेसियाबाट खगेन्द्र न्यौपाने (१३५७), कतारबाट राजु रेग्मी ‘राज’ (१९००), यूकेबाट रामशरण सिमखडा (१५५२) र जापानबाट रोविन शेरचन (२१८०) विजयी भएका छन् ।

यूकेबाट रोजिना प्रधान राईले १९४७ भोट ल्याएर महिला उपाध्यक्ष जित्दा उनकी प्रतिद्वन्द्वी साउदी अरवियाबाट वेगम सैयद १९१४ मतमा रोकिइन् ।

युवा उपाध्यक्षमा रोसन थापा २४६८ मत ल्याएर विजयी भए । उनका निकटम प्रतिद्वन्द्वी अब्दुल बासिदले १३२२ मत प्राप्त गरे ।

उपमहासचिवमा २१५० मत ल्याएर प्रवीन गुरुङ कतारबाट र १७९० मत ल्याएर सोमनाथ सापकोटा यूकेबाट निर्वाचित भएका छन् ।

१५ जनाको उम्मेदवारी परेको सचिव पदमा निर्वाचित भएका ६ जना सचिवमा १६७३ मत ल्याएर भीम केसी ‘कमल’, १७८२ मत ल्याएर डा. ज्ञानेन्द्र रेग्मी, २०२४ मत ल्याएर मनोजकुमार श्रेष्ठ, १८५३ मत ल्याएर डा. नवराज रोस्यारा, १६५१ मत ल्याएर पारमणि पोखरेल र १६६६ मत ल्याएर स्वतन्त्रप्रताप शाह निर्वाचित भएका छन् ।

महिला सचिवमा राधिका गुरुङ ‘टीका’ ले २३२० मत ल्याएर विजयी हुँदा विमला सापकोटा १५३९ मतमा रोकिइन् ।
कोषाध्यक्षमा ठाकुरप्रसाद ढुंगानालाई हराउँदै सुदनकुमार थापा निर्वाचित भए ।
सहकोषाध्यक्षमा कृष्णप्रसाद तिमल्सिना (२०१५), अभिमन्यू बस्नेत २०८१) र तिलकप्रसाद गैरे (२२३२) मत ल्याएर विजयी भए ।
अमृता थापा २२८७ मत ल्याएर महिला सहकोषाध्यक्षमा विजयी भइन् । उनकी प्रतिस्पर्धी तृष्णा शर्माले १५२२ मतमात्र ल्याइन् । अन्तर्राष्ट्रिय महिला संयोजकमा अनुजा प्रधानले २३३६ मत प्राप्त गरिन् ।
यस्तै संघको युवा संयोजकमा सुपेन्द्र घिसिङ २०३६ मतका साथ विजयी भए ।

सिस्टम कब्जा गरेको आरोप
एनआरएनए अन्तर्राष्ट्रिय समन्वय परिषदको भेरो सिस्टमबाट गरिएको मतदान प्रकृया सिस्टममै कब्जा जमाएको भन्दै अन्य उम्मेदवारहरुले नतिजामा गम्भिर असहती जनाएका छन ।
अमेरिकाबाट उपाध्यक्षमा उम्मेदवार रहेका डा केशव पौडेलले नेपालमा भएको मतदानबाट शून्य मत पाएको नतिजा सार्वजनिक भएको छ ।
मुख्य पदहरुमा नियोजित रुपमा केसीले आफ्नालाई जिताएको देखिएको अध्यक्षका उम्मेदवारद्वय श्रेष्ठ र शर्माले आरोप लगाएका छन।