काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीलाई जिम्मेवार राजनीतिक शक्तिका रूपमा अघि बढाउँदै गर्दा विगतमा छुटेका राजनीतिक तथा संगठनात्मक विषयका अध्यायहरू अध्ययन र सिकाइका लागि फर्केर हेर्नुपर्ने बताएका छन् ।
रास्वपाको ‘नीति, संगठन र नेतृत्व’ कार्यशालालाई आइतबार सम्बोधन गर्दै सभापति लामिछानेले रास्वपा जन्मिँदै अब्बल विद्यार्थी भएर जन्मिएको भए पनि कक्षा जम्प गर्दा छुटेका अध्यायहरू अध्ययन गर्न आवश्यक रहेको बताए ।
उनले भने, ‘रास्वपालाई जिम्मेवार ठाउँमा पुर्याउँदै गर्दा हामीले अध्ययन गर्नुपर्ने कतिपय कक्षाहरु जम्प गरेको पनि हुनसक्छ । कहिलेकाँही अब्बल विद्यार्थीहरुलाई दुईचार कक्षा चढाउने चलन पनि छ । रास्वपा जन्मिँदै अब्बल विद्यार्थी भएरै जन्मेको हो । तर कक्षाहरु जम्प गर्नुको अर्थ छुटाएका कक्षाहरुको अध्याय नै पढ्ने र सिक्ने होइन भन्ने होइन । छुटाएका कयौं अध्यायहरु छन् सरकारसम्म आइपुग्दा । यिनीहरुलाई फर्केर हेर्नैपर्ने हुन्छ । त्यसको लागि समय निकाल्नैपर्छ ।’
उनले राजनीतिक दल राजनीतिक दल बन्नका लागि केही सामान्य सिद्धान्तहरू हुने र ती सिद्धान्तको बीचमा बसेर अनुशासनको घेराभित्र रही नीति तथा विधिको पालना गर्दै अघि बढेमा पार्टी दीर्घकालसम्म बलियो राजनीतिक शक्तिका रूपमा अघि बढ्ने बताए ।
सभापति लामिछानेले पहिलो महाधिवेशनबाट निर्वाचित तथा भर्खरै मनोनित नेताहरूको जिम्मेवारी आगामी दिनमा आउने नेताहरूको भन्दा बढी रहेको बताए । त्यसकारण उनीहरूले प्रशिक्षणमा अझ बढी समय खर्च गर्नुपर्ने उनको भनाइ थियो ।
उनले रास्वपा अहिले पार्टीको जग बसाल्ने चरणमा रहेको बताए । ‘हामी जग बसाल्ने ठाउँमा छौं । स्थापनाकालदेखिका साथीहरु, संस्थापकहरु र पहिलो महाधिवेशनबाट निर्वाचित भएका नेतृत्वको जिम्मेवारी यो राजनीतिक दलको भविष्य कति परसम्म जान्छ भन्ने कुरामा निर्भर गर्दछ,’ उनले भने ।
रास्वपा कसरी आयो भन्ने विषयको हिसाब–किताब चोकचौतारामा दिँदै हिँड्न आवश्यक नरहेको भन्दै उनले पार्टीमा आइसकेपछि आफूहरूले के गरिरहेका छन् भन्ने विषयमा आमनागरिक र विश्व समुदायले हेरिरहेको बताए ।
‘हामी कसरी आयौं अब त्यसको हिसाब–किताब चोकचौतारीमा दिएर हिँड्न जरुरी छैन । आइसकेपछि हामी के गर्दैछौं ? आमनागरिकले, विश्व समुदायले हेरिरहेको छ,’ उनले भने ।
