विवाहित पुरुषसंग लभ होटल काण्ड : मेयर अकिराद्वारा पदबाट राजीनामा

गुन्मा । जापानको गुन्मा प्रिफेक्चरको माएबाशी शहरकी ४२ वर्षीया मेयर अकिरा ओगावाले आफ्नो पदबाट राजीनामा दिने निर्णय गरेकी छिन् ।
नगर परिषद्का अध्यक्ष किमिताका तोमितालाई आफ्नो राजीनामाको अनुरोध बुझाएकी छिन्।
मेयर ओगावाले विवाहित पुरुष अधीनस्थसँग लभ होटलमा बारम्बार जाने गरेको खुलासा भएपछि राजीनामाको चर्को दबाब खेप्दै आएकी थिइन ।
नगर परिषद्ले नोभेम्बर २७ मा नियमित सत्रको सुरुमा उनको विरुद्धमा अविश्वास प्रस्तावमा मतदान गर्ने कार्यक्रम थियो, जुन व्यापक रूपमा पारित हुने अपेक्षा गरिएको थियो। अध्यक्ष तोमिताले राजीनामा स्वीकार गर्दै “उनले गरेको निर्णयलाई महत्व दिन्छन्” भनी बताए; राजीनामा नोभेम्बर २७ देखि लागू हुने बताइएको छ।
मेयर ओगावाले विवाहित कर्मचारीसँग १० पटक भन्दा बढी होटलमा गएको स्वीकारिसकेकी थिइन, यद्यपि उनले रोमान्टिक सम्बन्ध नभएको र कामको समस्याबारे छलफल गर्न गएको स्पष्टीकरण दिएकी थिइन।
यो घटनाले शहरको छविमा ठेस पुगेको भन्दै नगर सभाले उनीमाथि कारबाही अगाडि बढाएको थियो।
जिजी प्रेस अनलाइनमा प्रकाशित समाचार अनुसार, नगर परिषद्का प्रतिनिधिहरूले राजीनामाको अनुरोध र त्यसपछिका घटनाक्रमहरूको व्यवस्थापनबारे छलफल गर्न आज नोभेम्बर २६ मा भेला भई राजीनामा पश्चात् विकसित घटनाक्रमको निकास दिने बताईएको छ ।