जय महांकाल युवा समूहको आयोजना हुने ‘चौथो महांकाल कप–२०८२’ आगामी वैशाख ११ र १२ गते हुने भएको छ । सोमबार पत्रकार सम्मेलन गरी ह्विलचियर बास्केटबल प्रतियोगितामा १३ टिमको सहभागिता रहने जानकारी दिइएको छ ।
प्रतियोगितामा ९ पुरुष टिम र ४ महिला टिमको सहभागीता रहने समूहका महासचिव मनिष विश्वकर्माले जानकारी दिनुभयो । कामपा ४ चण्डो स्थित विशाल मिलन केन्द्रको बास्केटबल खेल मैदानमा हुने प्रतियोगितामा विभागीय टिम नेपाल आर्मी, एपिएफको पनि सहभागिता रहने छ । विजेतालाई नगद २५ हजार, १५ हजार र १० हजारको साथमा ट्रफी, मेडल र प्रमाणपत्र प्रदान गरिनेछ । उत्कृष्ट खेलाडी र हाइ स्कोरर खेलाडीले दुई हजार र ट्रफी प्राप्त गर्नेछन् । प्रतियोगितामा सहभागी बन्ने करिब दुई सय खेलाडी र व्यवस्थापकलाई आयोजकले यातायात, खाना र आवासको व्यवस्था मिलाएको छ ।
प्रतियोगिता अवधिमा नायिका श्वेता खड्का, एलिजा गौतम, गायक दुर्गेश थापा, कलाकारहरू माया थामी, रिना थापा मगर, अस्मिता रानापाल, मुकेश नेपाली, शशिकला राई, अञ्जु सुनार, इन्दु थामी, कृष्ण मगर, सारा कार्की, मनु थामी, विमला थामी लगायतले प्रस्तुति दिने कार्यक्रम रहेको आयोजकले जनाएको छ ।
२०७६ सालमा स्थापना भएको जय महांकाल युवा समूहले अपाङ्गता भएका व्यक्तिहरूको जीवन उत्थान र सशक्तीकरणका लागि ह्विल चियर बास्केटबल प्रतियोगिता आयोजना गर्दै आएको छ । यो वर्षदेखि महिला टिमलाई पनि बास्केटबलमा सहभागी गराइएको विश्वकर्माले जानकारी दिए ।
