बिहिबार, फागुन १०, २०८०

सुगर ड्याडीबाट पैसा कसरी धुत्ने भनेर पुस्तक लेख्ने जापानी युवतीलाई प्रहरी समात्यो

टोकियो । सुगर ड्याडीहरूबाट पैसा कसरी धुत्ने भन्ने विषयमा पुस्तक लेखेकी माई वातानाबे स्वघोषित डेटिङ स्क्यामर २५ वर्षीय वातानाबेलाई अगष्टमा सामाजिक सञ्जालमा फलोअरहरूलाई डेटिङ स्क्याम म्यानुअल बेचेको आरोपमा समातियो । अधबैँसे र बुढा पुरुषलाई कसरी फसाउने, उनीहरूबाट सकेसम्म धेरै पैसा कसरी धुत्ने भन्नेबारे वातानाबेले गाइडबूक नै निकालेकी छिन् ।

नागोया सहरको नाका प्रहरी थानाका अनुसार वातानाबेले गएको वर्ष १० हजार येनदेखि २० हजार येनको बीचमा म्यानुअल बेच्न सुरु गरेकी थिइन् । गोप्य सिकाईका लागि उनले थप पैसा लिन्थिन् । पक्राउ पर्नुअघि वातानाबेले आफ्नो पुस्तकको २ हजारप्रति जति बेचेको जापानी सञ्चार माध्यमरुले बताएका छन् । वातानाबेकै किताब पढेर एक २० वर्षीय जापानी युवतीले आइची प्रिफेक्चरका २ पुरुषलाई १ करोड ६ लाख ५० हजार येन ठेगेपछि प्रहरीले वातानाबेबारे छानबिन सुरु गरेको थियो ।

आफूमाथि लागेको अभियोग वातानाबेले स्वीकार गरेकी छिन् । युवतीले गएको वर्ष सेप्टेम्बरमा ५० वर्षका एक पुरुषलाई २ करोड ७० लाख येन ठगेकी थिइन् । ५४ वर्षका अर्का एक पुरुषले पनि वातानाबेको खातामा ११ करोड ७० लाख येन हालिदिएको आरोप लगाएको भन्दै गएको महिना जापानी पत्रिका माइनिचीले समाचार छापेको थियो ।

वयस्क वा वृद्ध धनी पुरुषले आफूभन्दा साना उमेरका युवतीहरुलाई पैसा दिएर बनाउने सम्बन्ध नै सुगर रिलेशनशिप भनिन्छ । पाका उमेरका पुरुषसँग सम्बन्ध राखे बापत युवतीले मोटो रकम र सुख शयल पाउँछन् । यस्तो सम्बन्धमा रहेका युवतीलाई सुगर बेबी र पुरुषलाई सुगर ड्याडी भनिन्छ । पछिल्लो समय विश्वभर यसको चलन बढेको छ ।