शुक्रबार, चैत १६, २०८०

भारतिय प्रहरीको गोलि लागि मृत्यु भएका गौतम परिवार सहयोगार्थ जापानमा रकम संकलन

टोकियो,२७ फागुन । देशको सिमा रक्षाको लागि लड्दा लड्दै भारतीय सिमा फौजको गोलीबाट शहिद भएका गोविन्द गौतम परिवारको लागि जापानमा रहेका नेपालीहरुले सहयोग रकम संकलन थालेका छन् ।

देशको सिमा रक्षा गर्दा गर्दै बिदेशी सुरक्षा फौजबाट आफ्ना नागरिक मारिंदा सरकारले घण्टौं वितिसक्दा समेत प्रतिक्रिया नदिनु, शहिद परिवारको बारेमा सम्वोधन नगरिनु आदि कारणले देशको लागि लडेका नेपालीको लागि नेपालीनै सबै सहयोग गर्न तयार छन् भन्ने सन्देश दिंदै टपनेपालन्युजडटकमको पहलमा थालिएको रकम संकलनको सुरुवातमै यदुराम सापकोटा, ज्याक खड्का, गोकर्ण अधिकारीबाट तत्काल दश दश हजार जापानी येन प्राप्त भएको छ ।

यसैगरि जापानमा समाज सेवाको क्षेत्रमा सक्रिय युवा शिव तण्डुकारबाट तत्काल ५ हजार येन सहयोग प्राप्त भएको छ ।

देशको लागि प्राण आहुती दिने सच्चा शहिदको सम्मानमा परिवारको सहयोगको लागि थालिएको यो अभियान राज्यको लम्पसारवाद र बिदेशी सामु बनेको निरिहताको बिरोधको प्रतिक समेत बन्न पुगेको छ ।

आफ्ना नागरिक देशको रक्षाको लागि मारिंदा शहिद घोषणा, घटनाबारे सम्वोधन गर्नुको साटो सत्ता टिकाउन सरकार विस्तार र कुर्सीको वाँडफाँडमा लागेको लजास्पद घटनाबाट विछिप्त देशका सिमा रक्षक सच्चा नेपाली प्रतिको सम्मानको लागि थालिएको यो अभियानमा जापानमा रहनुभएका सबै स्वाभिमानी नेपालीहरुमा सक्दो सहयोगको लागि टपनेपालन्युजडटकम बिनम्र अनुरोध गर्दछ ।

व्यक्तिगत, संस्थागत तथा संगठन र सामाजिक संघसंस्थाको तर्फबाट समेत सक्दो सहयोग गरि देशको लागि प्राण आहुती दिनुभएका शहिद गोविन्द गौतम प्रतिको तपाईको सम्मानको अपेक्षा गर्दछौं ।

हामी तपाई सबै सहयोगी देशभक्त नेपालीहरुमाझ यहाँले गर्नुभएको सहयोग पूर्ण रुपमा परिवारले पाउने बाचा सहित यसको सबै जानकारी उपलब्ध गराउने बाचा गर्दछौं ।

तपाईले गर्नुभएको सहयोगले परदेशमा रहेर पनि देशको सुरक्षामा खटिएका हाम्रा वर्दी बिनाका सिमा रक्षक नेपालीहरुको हौसला बढ्ने हुनाले सहयोगको लागि बिनम्र अनुरोध गर्दछौं ।

सहयोग रकम जापान जेपी बैंकको १०१८०-९३९७७५४१ खाता नम्वरमा जम्मा गराउन सक्नुहुनेछ । टपनेपालन्युज डटकमले प्राप्त रकम विवरण हरेक दिन साँझ प्रस्तुत गर्नेछ । प्राप्त सहयोग रकम शहिद गोविन्द गौतम परिवारको १३ औं पूण्य तिथिका अवसरमा परिवारलाई हस्तान्तरण गरिने भएकाले मार्च १७ तारिख भित्र जम्मा गराइसक्नुहुन अनुरोध गर्दछौं । @topnepalnews.com