भद्रगोल सडकपेटी, पैदल यात्रुको ज्यान नै जाने खतरा

सरकारको चरम बेवास्ताका कारण संघीय राजधानी काठमाडौं उपत्यकासहित देशभरका सडकपेटी पैदल यात्रुका लागि असुविधाजनक मात्र नभएर ज्यान नै जाने जोखिम बनेका छन् ।

सडकपेटीभरी खाल्डाखुल्डी, यत्रतत्र छाडिएका तार तथा पोल र पोल काटेर छाडिएका ठुटाले सडकपेटीमा सहज रूपमा यात्रुले आवतजावत गर्न नपाउँदा पैदल यात्रुका लागि सडकपेटी असुविधा बनेका हुन् ।

पैदल यात्रुका लागि धेरै सडकपेटी खाल्डाखुल्डी र तारजालीमा अल्झिएर घाइते हुने अवस्थाका बनेका छन् ।

पसलका सामान अस्तव्यस्त रूपमा सडकपेटीमा राखिदिँदा पैदल यात्रु सवारी गुड्ने सडकबाट हिँड्न बाध्य भएका छन् भने त्यसले दुर्घटना निम्त्याएर ज्यानै जाने खतरा बढेको छ ।

उपत्यकाका अधिकांश ठाउँमा सडक पेटी नै मिचेर भवन निर्माण गरिएको पाइएको छ भने सरकारले त्यसको व्यवस्थापन गर्नेतर्फ ध्यान दिएको छैन ।

सरकारले सामान्यतया गाडी गुड्ने सडकको मर्मत तथा सम्भारमा ध्यान दिने गरे पनि सडकपेटी व्यवस्थित र यात्रुको सुविधामैत्री बनाउन कम चासो र बेवास्ता गर्दै आएको छ ।

सडक विभागका प्रवक्ता शिवहरी सापकोटाले फुटपाथ यात्रुलाई सहज हुनुपर्ने भए पनि कतिपय ठाउँमा जग्गाको समस्याले व्यवस्थित बनाउन कठिन भएको बताउँछन् ।

उनले यस्तो समस्या उपत्यकामा मात्र नभएर देशैभरी भएको बताए । सडकपेटी मिचेर भवन बनाइएको अवस्थामा भने स्थानीय सरकार दह्रो भएर त्यसलाई व्यवस्थित पार्ने काममा लाग्नुपर्ने उनी बताउँछन् । राजधानी दैनिकमा खबर छ ।

फेसबुकबाट तपाइको प्रतिक्रिया