Nepali date


शनिबार, कार्तिक २, २०७६

समृद्धि र सुशासन मुलुकको अन्तिम गन्तव्य : प्रधानमन्त्री ओली

काठमाडौँ । प्रधानमन्त्री केपी शर्मा ओलीले जन्मसिद्ध श्रेष्ठताको पराधीन मानसिकता नेपालीको गौरवपूर्ण संस्कृति हुनै नसक्ने बताउनुभएको छ । गणराज्यहरुबाट शुरु भएको मुलुकको गौरवपूर्ण इतिहास, प्राचीन सभ्यता र स्वतन्त्रता उच्च रहेको उल्लेख गर्दै उहाँले जन्मसिद्ध श्रेष्ठताको भ्रमपूर्ण कथ्य वैज्ञानिक सत्यतामा आधारित नभएको स्पष्ट गर्नुभयो ।

बाह्रौँ गणतन्त्र दिवसका अवसरमा आज सैनिक मञ्च टुँडिखेलमा आयोजित विशेष समारोहलाई सम्बोधन गर्दै मूल समारोह समितिका संयोजकसमेत रहनुभएका प्रधानमन्त्री ओलीले जनताले प्राप्त गरेका उपलब्धिलाई अस्वीकार गर्ने र उपलब्धिको अपमान गर्ने व्यवहार लोकतान्त्रिक गणतन्त्रविरुद्ध हुने बताउँदै गणतन्त्रलाई संस्थागत गरी जनजीवनको सार्थक अभ्यासमा उतार्न पनि यसको गरिमा र मर्यादालाई कायम राख्नुपर्नेमा जोड दिनुभयो ।
प्राचीन इतिहास स्मरण गर्दै प्रधानमन्त्रीले भन्नुभयो, “हाम्रो इतिहासमा राजा भनेर चिनिने प्राचीनकालका अगुवाहरु खासमा गणनायकहरु थिए, उनीहरु जनताबाट चुनिन्थे, पछिल्ला समयका जस्ता वंशाणुगत क्रममा अलोकतान्त्रिक विधिबाट सत्तामा पुगेका सामन्तवादका संरक्षक राजा थिएनन् ।”

विद्वताको गौरवशाली परम्परा भएको प्राचीन मिथिलामा महर्षिहरुले नायकत्व गरेको र प्राचीन शाक्य गणराज्यका शुद्धोधन पनि गणनायक रहेको बताउँदै प्रधानमन्त्री ओलीले मानवीय जीवनका दुःख, पीडा, द्वन्द्व र अशान्तिको अन्त्यहीन शृङ्खला देखेर सिद्धार्थ गौतमले त्यस्तो कुचक्रको अन्त्य गर्न पारिवारिक माया र स्नेह तोडेर ज्ञानको खोजीमा निस्किएको स्मरण गर्नुभयो । चार सय ६१ वर्षअघि हरेक साल लिगलिगकोटमा हुने दौडमा जसले जित्थ्यो ऊ नै वर्षभरिका लागि राजा हुने परम्परा रहेको उल्लेख गर्दै उहाँले त्यस बेलाको मुलुकको गौरव गर्नलायक इतिहासमा अनेकौँ बाहुबल, जालझेल र षड्यन्त्रले आफ्ना सन्तानलाई शासक बनाउने सामन्ती राजतन्त्रको शृङ्खला शुरु गरिएको बताउनुभयो ।

“आजको दिन त्यो शृङ्खलाको अन्त्य गरी आफ्नै मौलिक परम्पराअनुरुप जनताको शासन स्थापना गरिएको गौरवमय ऐतिहासिक दिन हो, यो जनताको विजय र कुलीनतन्त्रको पराजय भएको दिन हो, बलपूर्वक थोपरिएको अन्यायको विरुद्ध न्यायको जीत भएको दिन हो”, प्रधानमन्त्रीले भन्नुभयो ।
शान्ति, स्थिरता, विकास, समृद्धि र सुशासन मुलुकको अन्तिम गन्तव्य भएको बताउँदै प्रधानमन्त्री ओलीले नेपाली जनतामा लोकतन्त्रको सार्थक अनूभूति गराउने अभियानमा सरकार लागेको बताउनुभयो । “सुशासन र विकास आजको प्राथमिकता हो, हाम्रो पाइला त्यतातर्फ अग्रसर छ”, प्रधानमन्त्रीले थप्नुभयो ।

एक वर्षका अवधिमा सुशासन र विकासका लागि अवरोध पु¥याउने असान्दर्भिक ठहरिएका कतिपय नीति, विधि र संरचना परिवर्तन, परिमार्जन र खारेज गरिएको उहाँले जानकारी दिनुभयो । उहाँले समृद्ध नेपाल र सुखी नेपालीको गन्तव्यमा अघि बढ्ने दृढ इच्छाशक्ति भएको प्रगतिशील, देशभक्त र जनपक्षीय सरकार र सात प्रदेश तथा ७५३ वटै सरकारलाई एउटै लय र तालमा समृद्धिको गन्तव्यतर्m अग्रसर गराउनु मुख्य दायित्व भएको बताउनुभयो ।

प्रधानमन्त्रीले छिमेकी सम्बन्ध र मित्रराष्ट्रसँगको कूटनीतिले आवश्यक स्रोत, साधन र सामथ्र्यको प्रयोग र सहकार्यमा थप अनुकूलता मिलेको बताउनुभयो । उहाँले संविधान विपरीत राष्ट्रिय अखण्डतामाथि चुनौती बनिरहेका शक्तिसमेत मूलधारमा समाहित भएको तथा अस्थिरताको पक्षपोषण गर्ने शक्ति छट्पटाइरहेकोे जिकिर गर्नुभयो ।

उहाँले गणतन्त्रलाई जनताको जीवनस्तर उकास्नका लागि सरकार रोजगारीको अवसर सिर्जना गर्ने, उत्पादन वृद्धि र उपभोग्य वस्तुमा आत्मनिर्भरता बढाउने तथा विकासका आयोजनाको गति बढाउन लागिपरेको बताउनुभयो ।

फेसबुकबाट तपाइको प्रतिक्रिया