नुवाकोट । नुवाकोटको पूर्वी भेगमा रहेको थप्रेकमा राष्ट्रसंघीय विकास कार्यक्रम (यूएनडीपी) का कर्मचारी चढेको गाडी दुर्घटना भएको छ ।
मंगलबार बेलुकी दुर्घटना हुँदा चालकको घटनास्थलमै ज्यान गएको छ भने पाँचजना घाइते भएका छन् ।
घाइतेमध्ये दुई जनाको अवस्था गम्भीर छ । सदरमुकाम विदुरदेखि ३५ किलोमिटर पूर्वमा रहेको पञ्चकन्या गाउँपालिका–४ थप्रेकस्थित आरुखर्क सनलघारीमा यूनडीपीका कर्मचारी सवार बा ३ च ५७११ नम्बरको टाटा सुमो गाडी दुर्घटना भएकाे हाे । गाडी कच्ची सडकबाट एक सय ५० मिटर तल खसेको छ ।
दुर्घटनामा चालक सर्लाहीका २४ वर्षीय सुमन बुढाथोकीको घटनास्थलमै मृत्यु भएको जिल्ला प्रहरी कार्यालय नुवाकोटका प्रमुख तथा प्रहरी उपरीक्षक कृष्णबहादुर पल्लिमगरले जानकारी दिए ।
दुर्घटनाअघि उक्त गाडी घ्याङफेदी पुगेर सातविसे हुँदै आरुखर्क जाँदै गरेको उनले बताए । दुर्घटनालगत्तै स्थानीयवासीले घाइतेको उद्धार गरेका थिए ।
घाइतेको उद्धार गरी उपचारका लागि काठमाडौ पठाइएको खरानीटार इलाका प्रहरी चौकीका इन्जार्च प्रहरी निरीक्षक नरेशकुमार महतोले जानकारी दिए ।
थप्रेकमा युएनडीपीको सहयोगमा निर्माण भई रहेको स्वास्थ्य चौकीको निरीक्षण गर्न कर्मचारीको टोली त्यसतर्फ गएका थिए ।
