स्वास्थ्य संस्था भवन निर्माणमा ढिलाइले सेवा प्रभावित

म्याग्दी, १० कात्तिक । म्याग्दीका स्वास्थ्य संस्थाको भवन निर्माणमा भएको ढिलासुस्तीका कारण सेवा प्रवाहमा समस्या भएको छ ।

निर्माण व्यवसायीको ढिलासुस्तीका कारण निर्धारित समयमा भवन नबन्दा उपचार सेवा प्रवाहमा समस्या भएको हो । अन्नपूर्ण गाउँपालिका–८ राम्चेमा १८ महिनामा सम्पन्न गर्ने लक्ष्यसहित विसं २०७१ मा शुरु भएको स्वास्थ्य चौकीको भवन निर्माण कार्य अझै पूरा हुन सकेको छैन ।

एक वर्षअघि नै सकिनुपर्ने भवन अझै पूरा नहुँदा अलपत्र पर्नुका साथै सेवा प्रवाहमा असर परेको राम्चे स्वास्थ्य चौकी व्यवस्थापन समितिका अध्यक्ष राजु पुनले बताउनुभयो । हाल वडा कार्यालयसँगैको दुईवटा कोठाबाट स्वास्थ्य चौकी सञ्चालन हँुदै आएको छ ।

बिरामीको स्वास्थ्य परीक्षण, परामर्श, सुरक्षित प्रसूति, औषधि भण्डारणजस्ता कक्षको अभाव हुँदा समस्या भएको हो । सो भवन निर्माणको जिम्मा लिएको भगवती निर्माण सेवाका सञ्चालक गोपाल भट्टचनले भौगोलिक विकटता र प्रतिकूल मौसमका कारण ढिलाइ भएको बताउनुभयो ।

हिउँद र बर्खामा प्रतिकूल मौसमका कारण काम गर्न नसक्नु तथा दुर्गम भएकाले बालुवा, सिमेन्ट, रड, ढुंगाजस्ता निर्माण सामग्री ढुवानी गर्न समस्या भएको उहाँको भनाइ छ । राम्चेको मात्र नभएर गत असारमै सकिनुपर्ने बिम, बरंजा र पिप्ले स्वास्थ्य चौकीको भवनको अवस्था पनि उस्तै छ ।

अठार महिनामा सक्ने लक्ष्यसहित विसं २०७० मा बेनीमा शुरु भएको जिल्ला जनस्वास्थ्य कार्यालयको भवन निर्माण कार्य हालै मात्र सकेर हस्तान्तरण भएको थियो । डिभिजनका इञ्जिनियर गणेश महर्जनले भौगोलिक विकटता र व्यवसायीले समयमै काम नगर्दा भवन निर्माणमा ढिलाइ भएको बताउनुभयो ।

ढिलाइ गर्ने व्यससायीलाई ताकेता गरिरहेको उहाँले बताउनुभयो । उहाँका अनुसार बरंजा, पिप्ले र बिमको भवन निर्माण कार्य अन्तिम चरणमा पुगेको छ । यसैगरी विसं २०७३ देखि देविस्थान र भगवती स्वास्थ्य चौकीको भवन निर्माण कार्य शुरु भएको छ ।

यस वर्ष थप छवटा स्वास्थ्य चौकीको भवन निर्माणका लागि ठेक्का प्रक्रिया अघि बढाइएको छ । कुइनेमंगले, घार, हिस्तान, पुलाचौर, कुहुँ, ओखरबोट र मल्कवाङ स्वास्थ्य चौकीको भवन निर्माणका लागि ठेक्का सम्झौताको तयारी भएको इञ्जिनियर महर्जनले बताउनुभयो ।

यसैगरी, बेनी अस्पतालको ५० सैयया क्षमताको भवन र चिकित्सक निवासका दुईवटा भवन निर्माणको काम शुरु भएको छ

फेसबुकबाट तपाइको प्रतिक्रिया

%d bloggers like this: