काठमाडौँ, २८ भदौ । त्रिभुवन शिक्षण अस्पताल महाराजगञ्जमा उपचारका लागि भर्ना भएका वृद्धवृद्धाको सहयोगार्थ एकल चित्रकला प्रदर्शन गरिएको छ ।
अस्पतालमा भर्ना भएका ७५ वर्षभन्दा बढी उमेरका वृद्धवृद्धाको उपचारमा सहयोग पु¥याउने उद्देश्यले सोही अस्पतालकी नर्स एवं कलाकार रचना मास्केले कोर्नुभएको चित्रकला आजदेखि प्रदर्शनीमा राखिएको हो ।
प्रदर्शनीको उद्घाटन गर्दे नेपाली काँग्रेसका नेता प्रकाशमान सिंहले ज्येष्ठ नागरिक देशका गहना भएकाले उहाँहरुको सहयोगका लागि लोककीर्ति ज्येष्ठ नागरिक कोषले मास्केको चित्रकला प्रदर्शनमा राखेर पवित्र काम गरेको बताउनुभयो ।
पूर्व उपप्रधानमन्त्री सिंहले बिरामी भएर उपचारको समस्यामा परेको ज्येष्ठ नागरिकका लागि सरकारले विशेष कार्यक्रम ल्याउनुपर्ने बताउनुभयो । नेता सिंहले समाजलाई परिवर्तन ल्याउनका लागि राजनीतिक क्षेत्रको महत्वपूर्ण भूमिका रहेको भन्दै राजनीतिलाई सकारात्मक दृष्टिकोणले हेर्न आग्रह गर्नुभयो ।
चिकित्सा शास्त्र अध्ययन संस्थान (आइओएम)का डिन डा जगदिशप्रसाद अग्रवालले वृद्धवृद्धाको उपचारका लागि चित्रकला बेचेर सहयोग गर्न लागेको भन्दै उक्त कामको उच्च प्रशंशा गर्नुभयो । उहाँले ज्येष्ठ नागरिकको उपचारका लागि अस्पतालले छुट्टै वार्ड बनाउने कुरामा सम्बन्धित पक्षसँग छलफल गरिरहेको स्पष्ट पार्नुभयो ।
लोककीर्ति ज्येष्ठ नागरिक कोषका अध्यक्ष ओम मास्केले ज्येष्ठ नागरिकको उपचारका लागि राज्यले बेवास्था गरेको आरोप लगाउनुभयो ।
आगामी भदौ ३० गतेसम्म चल्ने प्रदर्शनीमा मास्केले कोर्नुभएका ३२ चित्र प्रदर्शनमा राखिएका छन् । रासस
