काठमाडौँ । नेपाली कांग्रेसले आदिवासी जनजातिहरूको नेतृत्व र प्रतिनिधित्वको सवाललाई उचित ढङ्गले सम्बोधन गर्ने प्रतिबद्धता जनाएको छ ।
पार्टी मुख्यालय सानेपामा आइतबार पुगेका नेपाल आदिवासी जनजाति महासंघका पदाधिकारीहरूले बुझाएको अडानपत्र ग्रहण गर्दै कांग्रेस उपसभापति पुष्पा भुसालले संविधानले नै आदिवासी जनजातिको प्रतिनिधित्व सुनिश्चित गरेकाले पार्टीभित्र र सरकारमा पनि उचित प्रतिनिधित्व र नेतृत्वका लागि कांग्रेसले संसदभित्र र बाहिर पहल गर्ने बताइन् ।
उनले काँग्रेसले संविधान संशोधनबारे स्पष्ट दृष्टिकोण बनाउन गइरहेको उल्लेख गर्दै आदिवासी जनजातिको अधिकारका सवाललाई गम्भीरतापूर्वक अघि बढाइने आश्वासन दिइन् ।
त्यस अवसरमा महासङ्घका अध्यक्ष नीमा लामा ह्योल्मोले समावेशी सिद्धान्त अवलम्बन गर्दै आएको काँग्रेसले आदिवासी जनजातिको अधिकार सुनिश्चित गर्न महत्वपूर्ण भूमिका खेल्ने विश्वास व्यक्त गरेका थिए ।
अध्यक्ष ह्योल्मोले २०७२ सालको संविधानमा आदिवासी जनजातिका धेरै अधिकार लिपिबद्ध भएको उल्लेख गर्दै ती अधिकार कार्यान्वयन गर्ने चरणमा अहिलेको राजनीतिक नेतृत्वले जिम्मेवार भूमिका निर्वाह गर्नुपर्ने बताए ।
