वाशिङ्टन । अमेरिकाले इरानका बन्दरगाहहरूमा नाकाबन्दी सुरु गरेको छ । यस कदमले तेहरानलाई आक्रोशित बनाउनुका साथै महत्वपूर्ण जलमार्गबारे अनिश्चितता बढाएको छ । यद्यपि युद्ध अन्त्यका लागि सम्भावित संवादको आशाले अन्तर्राष्ट्रिय तेल बजारमा केही राहत देखिएको छ, जहाँ मङ्गलबार मापदण्ड कच्चा तेलको मूल्य १०० डलरभन्दा तल झरेको छ।
इस्लामाबादमा सप्ताहन्तमा अमेरिका र इरानबीच भएको वार्ता असफल भएपछि पनि कूटनीतिक प्रयास जारी रहेको जनाइएको छ। एक अमेरिकी अधिकारीका अनुसार सम्झौतामा पुग्ने प्रयासमा संवाद निरन्तर अघि बढिरहेको छ। पाकिस्तानका प्रधानमन्त्री शहबाज शरीफले पनि द्वन्द्व समाधानका लागि प्रयासहरू जारी रहेको बताएका छन्।
अमेरिकी राष्ट्रपति डोनाल्ड ट्रम्पले सोमबार इरानले सम्पर्क गरी सम्झौता गर्न इच्छा देखाएको बताएका छन् । तर, इरानलाई आणविक हतियार राख्न अनुमति दिने कुनै पनि सम्झौता स्वीकार्य नहुने उनले स्पष्ट पारे।
फेब्रुअरी २८ मा अमेरिका र इजरायलले युद्ध सुरु गरेपछि इरानले आफ्नो जहाज बाहेक अन्य सबैका लागि होर्मुज जलडमरूमध्य प्रभावकारी रूपमा बन्द गरेको छ। इरानले उक्त मार्ग आफ्नो नियन्त्रणमा मात्र सञ्चालन हुने र शुल्क तिरेपछि मात्र आवागमन अनुमति हुने जनाएको छ।
यसको विश्वव्यापी प्रभाव परेको छ, किनकी द्वन्द्व अघि विश्वको करिब पाँचौं भाग तेल र ग्यास आपूर्ति यही जलमार्ग हुँदै हुने गरेको थियो।
ट्रम्पले अमेरिकाले इरानी जहाजहरू तथा त्यस्तो शुल्क तिर्ने अन्य जहाजहरूलाई समेत अवरोध गर्ने चेतावनी दिएका छन्। साथै, नाकाबन्दी नजिक आउने इरानका ‘द्रुत आक्रमण’ नौसैनिक जहाजहरूलाई नष्ट गरिने बताएका छन्।
तेहरानले भने उक्त क्षेत्रमा सञ्चालन हुने नौसैनिक जहाजहरूलाई निशाना बनाउने तथा खाडी क्षेत्रका छिमेकी देशका बन्दरगाहहरूमा प्रतिकारात्मक आक्रमण गर्ने चेतावनी दिएको छ।
