काठमाडौं । मानव जीवनको गहिरो अर्थ, धर्म, त्याग, सङ्घर्ष र आत्मबोधलाई उजागर गर्ने बौद्ध दर्शन र आध्यात्मिक जीवनमा आधारित बहुप्रतिक्षित नाटक ‘मिलारेपा’ बेलायतमा प्रदर्शन हुने भएको छ ।
बुद्धिष्ट कम्युनिटी सेन्टर यूके (BCCUK) को आयोजनामा आगामी ८ मार्च २०२६ मा बेलायतको एल्डरशटस्थित प्रिन्सेस हल (Princes Hall) मा साँझ ६ बजे यो ऐतिहासिक नाटक प्रदर्शन हुन लागेको हो। नाटक प्रदर्शनका लागि नाटकका संयोजक गुरु कोशिस लोब्साङ वाइबा र प्रख्यात अभिनेता एवं निर्देशक बुद्धि तामाङ आगामी मार्च १ तारिखमा बेलायत प्रस्थान गर्ने कार्यक्रम तय भएको छ।
काे हुन् मिलारेपा?
मिलारेपा ११औं शताब्दीका एक महान बौद्ध योगी र तान्त्रिक हुन्। उनको जीवन कथा अत्यन्तै प्रेरणादायी छ। एक समयमा प्रतिशोध र पापको बाटोमा लागेका व्यक्तिले कसरी पश्चात्ताप र कठिन साधनाद्वारा बुद्धत्व प्राप्त गर्न सक्छन् भन्ने कुरा उनको जीवनीले सिकाउँछ।
नाटकका मुख्य विशेषताहरू:
यस नाटकले मिलारेपाको जीवनका विभिन्न आयामहरूलाई जीवन्त रूपमा प्रस्तुत गर्नेछ:
• पश्चात्ताप र परिवर्तन: विगतका गल्तीहरूलाई स्वीकार्दै आध्यात्मिक मार्गमा लागेको यात्रा।
• गुरुभक्ति: आफ्ना गुरुप्रति देखाएको अटल श्रद्धा र विश्वास।
• दृढ संकल्प: वैराग्य र कठोर साधनाको माध्यमबाट ज्ञान प्राप्तिको अद्भुत मार्ग।
• आशाको सन्देश: मानिसले विगतमा जस्तै अकुशल कर्म गरे तापनि सच्चा पश्चात्ताप र संकल्प गरेमा यसै जीवनमा बुद्धत्व प्राप्त गर्न सम्भव छ भन्ने सन्देश।
बेलायतमा रहनुभएका सम्पूर्ण नेपाली एवं बौद्ध धर्मावलम्बी महानुभावहरूलाई यस महत्वपूर्ण अवसरमा उपस्थित भई नाटकको गरिमा बढाइदिनुहुन कार्यक्रमका संयोजक गुरु कोशिस लोब्साङ वाइबाले आग्रह गर्नुभएको छ। नेपालमा अत्यधिक सफल भएको यो नाटकले बेलायतमा पनि उत्तिकै माया पाउने विश्वास आयोजकले लिएको छ।
त्यस्तै, ‘मिलारेपा’ नाटक बौद्ध धर्मावलम्बीहरूका लागि मात्र नभई, सर्वसाधारण दर्शकहरूका लागि पनि जीवनको यथार्थ सत्य, धर्मको मर्म, लोभ–क्रोध–अहंकारबाट मुक्त हुने मार्ग तथा आत्ममन्थनको गहिरो अवसर प्रदान गर्नेछ र मिलारेपाको त्याग, पश्चात्ताप र कठोर साधनाले दर्शकलाई आफ्नै जीवनमाथि पुनः सोच्न प्रेरित गर्ने विश्वास आयोजकको रहेको छ ।
एल्डरशटको सफल प्रदर्शनपछि यो नाटक बेलायतका अन्य विभिन्न शहरहरूमा पनि देखाउने योजना रहेको आयोजक BCCUK गुम्बा परिवारले जनाएको छ।
टिकट बीसीसी यूकेको अल्डरसटस्थित गुम्बा वा अनलाइनमार्फत खरिद गर्न सकिने बताएको छ।
सम्पर्कका लागि:
• भीपी क्याप्टेन देव घले: 07703 328590
• जीएस मेजर कुमार गुरुङ: 07720 383333
• अध्यक्ष आङ दावा शेर्पा: 07455 911159
