अरु भेरियन्ट भन्दा डेल्टा भेरियन्ट खतरा

कोरोनाभाइरसको डेल्टा भेरियन्टबाट बिरामी परेका मानिसहरू अल्फा र केन्ट भेरियन्टबाट बिरामी परेकाभन्दा बढी सिकिस्त हुने तथ्याङ्कहरूले देखाएका छन् । बेलायतमा गरिएको एक अध्ययनले डेल्टाबाट सङ्क्रमित मानिसहरूलाई अरू भेरियन्टभन्दा बढी अस्पताल जानुपर्ने अवस्था आएको समेत देखाएको छ ।

कोभिडविरुद्ध खोपको महत्वमा जोड दिँदै चिकित्सासम्बन्धी अनुसन्धान प्रकाशन गर्ने लान्सेट जर्नलमा छापिएको प्रतिवेदनले कोभिड खोपले डेल्टासहित जुनसुकै भेरियन्टबाट पनि सिकिस्त बिरामी हुनबाट रोक्ने उल्लेख गरेको छ ।

बेलायतलगायत धेरै देशहरूमा डेल्टा भेरिअन्ट मुख्य चुनौतीको रूपमा देखिएको छ । पब्लिक हेल्थ इङ्गल्यान्ड र मेडिकल रिसर्च काउन्सिलले गत मार्चदेखि मे महिनाबीचका ४३ हजार ३३८ कोभिड सङ्क्रमितको अध्ययन गरेका थिए ।

डेल्टा र अल्फा भेरिअन्ट फैलिएको उक्त समयमा गरिएको अध्ययनले एक मात्रा पनि खोप नलगाएका मानिसहरू बढी सङ्क्रमित भएको देखाएको थियो ।

अध्ययनमा समेटिएकामध्ये अधिकांशलाई अस्पताल जानुपर्ने आवश्यकता नपरे पनि डेल्टा भेरियन्टबाट सङ्क्रमित मध्ये २.३ प्रतिशत अर्थात् १९६ जनालाई र अल्फा भेरियन्टबाट सङ्क्रमित मध्ये २.२ प्रतिशत अर्थात् ७६४ अस्पतालको आवश्यकता परेको थियो ।

फरक–फरक उमेर, लिङ्ग र जातजातिको विवरण मिलाउँदा अल्फाभन्दा डेल्टा भेरियन्टबाट सङ्क्रमित हुनेहरू अस्पताल भर्ना हुनुपर्ने खतरा समेत दोबर देखिएको थियो । विज्ञहरूले उच्चतम सुरक्षाका लागि दुवै मात्रा खोप लगाउनुपर्ने बताएका छन् ।

पब्लिक हेल्थ इङ्गल्यान्डको पछिल्लो विश्लेषणले फाइजर खोप लगाएकाहरूलाई ९६ प्रतिशत र आस्ट्राजेनेका लगाएकाहरूलाई ९२ प्रतिशतसम्म अस्पताल भर्ना हुनबाट बचाउने उल्लेख गरेको छ।

अन्य अनुसन्धानहरूले लक्षण सहितको सङ्क्रमणबाट बचाउने दर भने निश्चित समयपछि खस्कँदै जाने बताएका छन् । तर पनि खोपहरूले डेल्टा भेरियन्टले निम्त्याउने अस्पताल भर्ना र मृत्युलाई रोक्न निकै सहयोग गर्ने अनुसन्धानले देखाएको छ ।

बेलायतमा १६ वर्ष माथिका ८८ प्रतिशत अर्थात् चार करोड ७९ लाख मानिसहरूले कोभिड खोपको पहिलो मात्रा लगाइसकेका छन् । दोस्रो मात्रा लगाउने चार करोड २० लाख अर्थात् ७८ प्रतिशत छन् ।

दोस्रो मात्रा लगाएको पनि केही हप्तापछि मात्रै कोभिडबाट बच्ने प्रतिरक्षा विकास हुने बताइएको छ । ‘खोपहरूले डेल्टा भेरिअन्टबाट पनि बचाउने हामी सबैलाई थाहा भइसकेका कारण अब खोप लगाउन बाँकी सबैले सकेसम्म छिटो दुवै मात्रा खोप लगाउन आवश्यक छ’ पब्लिक हेल्थ इङ्गल्यान्डका डा. गभिन दबरेरा भन्छन् ।

फेसबुकबाट तपाइको प्रतिक्रिया

%d bloggers like this: