काठमाडौं। नेपालको संविधान जारी भएदेखि नै विरोध गर्दै आएको भारतका राष्ट्रपति रामनाथ कोविन्दले नेपालको चौथो संविधान दिवसका दिन शुभकामना दिएपछि कुटनैतिक वृत्तमा तरंग आएको छ । नेपालले यसअघि ३ पटक संविधान दिवस मनाइसक्दा भारतको तर्फबाट कहिल्यै शुभकामना नआएकोमा चौथो दिवसमा राष्ट्रपतिले नै शुभकामना दिएपछि यसको अर्थ खोज्न थालिएको छ ।
राष्ट्रपति कोविन्दले आज नेपालकी राष्ट्रपति विद्यादेवी भण्डारीलाई शुभकामना सन्देश पठाएका हुन् । राष्ट्रपतिले शुभकामना सन्देश पठाए पनि भारतका प्रधानमन्त्री नरेन्द्र मोदी भने अझैसम्म मौन छन् । भारतको तर्फबाट यसअघि भने कहिल्यै शुभकामना आएको थिएन र भारतले नेपालकोसंविधान जारी हुँदा त्यसको स्वागत पनि गरेको थिएन ।
नेपालमा संविधान जारी भए लगत्तै भारतले नेपालमा अघोषित नाकाबन्दी लगाएको थियो । भारतले नाकाबन्दी लगाउँदै नेपाललाई संविधान संशोधन गर्न दबाब दिएको थियो । तर, तत्कालीन सरकार नझुकेपछि अन्ततः भारत झुक्न बाध्य भएको थियो । संविधान जारी हुनु २ दिन अघि पनि भारतले आफ्ना दूत पठाएर नेपालका शीर्ष नेतालाई संविधान जारी नगर्न दबाब दिएको थियो । यद्यपि त्यतिबेला नेपालका नेताहरु झुकेनन् । भारतले अहिले पनि नेपालको संविधान संशोधन हुनुपर्ने मत राख्दै आएको छ ।
