विश्व बैंक र अर्थमन्त्रालयबीच आर्थिक सम्झौतामा हस्ताक्षर

काठमाडौं । नेपालको सहरी विकास र वित्तिय क्षेत्रको सुदृढीकरणका लागि विश्व बैंक र अर्थ मन्त्रालयबीच ४२ अर्ब रुपैयाँ बराबरको आर्थिक सम्झौतामा हस्ताक्षर भएको छ ।

नेपालको ‘सहरी विकास र पूर्वाधार आयोजना’ र ‘आर्थिक वृद्धिका लागि वित्त’ विकास नीति सहायता सम्बन्धी दुईवटा सम्झौतामा विश्व बैंक र अर्थमन्त्रालयबीच बुधबार सम्झौता भएको हो । सम्झौता पत्रमा नेपालकातर्फबाट अर्थ सचिव शिशिर कुमार ढुंगाना र माल्दिभ्स, नेपाल र श्रीलंकाका लागि विश्व बैंकका राष्ट्रिय निर्देशक फारिस हदाद जर्भोसले हस्ताक्षर गरेक छन् ।

सहायताअन्तर्गत करिब १८ अर्ब रुपैयाँ (१ सय ५० मिलियन अमेरिकी डलर) बराबरको रकम विभिन्न ३३ वटा नगरपालिकाको सहरी विकास र पूर्वाधार आयोजनामा खर्च हुनेछ ।

सो रकम पूर्वी तराई क्षेत्रमा प्रदेश एक र दुईका तथा पश्चिमी क्षेत्रमा गण्डकी प्रदेश र लुम्बिनी प्रदेशका नगरपालिकाहरुमा खर्च गरिने अर्थसचिव ढुंगानाले जानकारी दिए । यस्तै नेपालको वित्तिय क्षेत्रको स्थिरतालाई सुदृढ बनाउन, वित्तिय समाधानका लागि उपकरणहरुमा विविधता ल्याउन र वित्तिय सेवाहरुको पहुँचमा वृद्धि गर्नका लागि विश्व बैंकले करिब २४ अर्ब रुपैयाँ (२ सय मिलियन अमेरिकी डलर) बराबरको आर्थिक सहयोग पनि गरेको छ ।

विश्व बैंकको यो सहयोगले नेपालमा सहरी विकासको सुदृढीकरण, सहरी गुणस्तर विकास र वित्तिय क्षेत्रको स्थिरतामा सुधार पुर्याउन सहयोग पुग्ने अपेक्षा गरिएको छ । कार्यक्रममा विश्व बैंकका राष्ट्रिय निर्देशक फारिस हदाद जर्भोसले राहत, पुनरुत्थान र उत्थानशिल आयोजना कार्यान्वयनका लागि नेपाल सरकारको प्रयासमा विश्व बैंकले सधै सहयोग पुर्याउँदै आएको बताए ।

फेसबुकबाट तपाइको प्रतिक्रिया