ओली सरकारका पालामा भएका अनियमितताका सबै विषय छानबिन गर्न सरकारलाई माधव नेपालको आग्रह

बनेपा । नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपालले प्रधानमन्त्री शेरबहादुर देउवा नेतृत्वको सरकारलाई भ्रष्टाचारको छानबिन गर्न आग्रह गरेका छन् ।

एकीकृत समाजवादी काभ्रेपलाञ्चोकको जिल्ला पार्टी कार्यालयको उद्घाटन एवं विजयादशमी, शुभदीपावली, नेपाल संवत् र छठपर्वको अवसरमा शनिबार आयोजित शुभकामना आदान–प्रदान तथा चियापान कार्यक्रममा अध्यक्ष नेपालले सरकारमा बस्नेले गलत बाटोमा जान छुट नभएको उल्लेख गर्दै भ्रष्टाचार गर्नेलाई जोसुकै भए पनि कारबाहीको दायरामा ल्याउनुपर्ने बताए ।

केपी शर्मा ओली सरकारको पालामा भएका यती, कोरोना महामारीको बेलामा भएको औषधि खरिदलगायत धेरै मुद्दाको ढाकछोप गर्ने कोसिस भएको बताउँदै उनले राज्यको सम्पत्तिको दुरुपयोग गर्नेलाई एक–एक छानबिन गर्ने काम गर्न आग्रह गरे ।

“संसारका देशमा प्रधानमन्त्रीदेखि जुनसुकै ओहोदाका व्यक्तिलाई पनि राज्यको सम्पत्तिको दुरुपयोग गर्छ र भ्रष्टाचार गर्छ भने त्यसमाथि छानबिन हुन्छ”, उनले भने, “तर यहाँ कुनै पनि छानबिन भएन, त्यसतर्फ ध्यान दिन प्रधानमन्त्री र वर्तमान सरकारलई म आग्रह गर्न चाहन्छु ।”

त्यसक्रममा उनले आफ्नो पार्टी लोकतान्त्रिक विधि र तरिका अवलम्बन गर्न चाहेको भन्दै पार्टीबाट मन्त्रालयको जिम्मेवारी सम्हालेका मन्त्रीलाई पनि राम्रो काम गरेर देखाउन र यदि गलत काम गरेको खण्डमा त्यहाँ राखिने छैन भनेर प्रस्ट भनिसकेको बताए ।

“यदि भनेजस्तो काम गरेन भने कारबाही गर्दै मन्त्रीबाट हटाइनेछ”, उनले भने, “भ्रष्टाचार, अनुचित काम गर्ने र देशलाई आँच पुर्याउने खालका काम गर्नेलाई छुट दिन सकिदैन ।”

उनले आफ्नो पार्टीबाट मन्त्री भएकालाई आइतबार बोलाएको बताउँदै त्यसक्रममा थप निर्देशन दिने उनले बताए । उनले सरकारमा बस्नेलाई गलत काम गर्न छुट नभएको उल्लेख गर्दै यसअघिको ओली सरकारका पालामा देशको ढुङ्गा, गिट्टी, बालुवा सबै भारत निकासी गर्न छुट दिएर चुरेभावर क्षेत्र बिजोग हुने र पर्यावरणमा असर पार्ने अवस्था बन्दै गएको बेला आफूले त्यसको रोक लगाउन आवाज उठाएको स्मरण गरे ।

गणतन्त्रको खिसिट्युरी गरेकाले सरकार ढालेको र अझै पनि त्यस्तै व्यवहार देखाए पार्टीमा पनि समस्या उत्पन्न हुने उल्लेख गर्दै कर्णाली प्रदेशमा आफू नेतृत्वको पार्टी सरकारमा सामेल भइसकेको बताए । अब बागमती प्रदेश र प्रदेश नम्बर १ मा छिट्टै नै आफू नेतृत्वको पार्टीको नेतृत्वमा सरकार बन्ने निश्चित भएको उनले बताए ।

त्यससँगै सुदूरपश्चिम प्रदेशमा आफू नेतृत्वको पार्टी एक नम्बरको भएको र प्रदेश २ मा एकीकृत समाजवादी पार्टी एमालेभन्दा अगाडि रहेको दाबी गरे । पार्टी विस्तारै मजबुद हुँदै गएको दाबी गर्दै उनले नेता, कार्यकर्तालाई आफ्नो तह र जिम्मेवारीलाई अवलम्बन गर्न निर्देशन दिए ।

पाँच दलको गठबन्धन सरकार भएको जस्तै अब हुने स्थानीय तहको निर्वाचनमा गठबन्धन सरकारमा रहेका दललगायत अरु दलसँग सुमधुर सम्बन्ध राख्दै सहमति गरेर अगाडि बढ्न उनले निर्देशन दिए ।

उनले विदेशी वस्तुुले बजार ओगट्न थालेकाले त्यस्तो अवस्थालाई आफ्नो पार्टी बन्द गर्न चाहेको भन्दै युवालाई व्यावसायिक सीप, ज्ञान, पूँजी र बजार उपलब्ध गराएर उत्पादनमा अग्रसर गराउने काम गर्न आवश्यक रहेको बताए ।

कार्यक्रममा नेपाली कांग्रेसका केन्द्रीय सदस्य शिवप्रसाद हुमागाईँले अघिल्लो सरकारले गरेको गलत कामका विरुद्धमा सङ्घर्ष गरेर गुम्न लागेको उपलब्धिलाई रक्षा गर्नका लागि हिम्मतका साथ अगाडि बढेर गरेको प्रतिगमनविरुद्धको आन्दोलनको नेतृत्व गरेको भन्दै माधवकुमार नेपालको प्रसंशा गरे ।

कार्यक्रममा नेकपा (क्रान्तिकारी माओवादी) का केन्द्रीय सदस्य कान्छाराम तामाङले विचारले नै सबै चिजको निर्धारण गर्ने भएकाले विचारसहित पार्टी गठन गरेर नेपालले सही निर्णय गरेको बताए । जुनसुकै दलको नेतृत्वमा सरकार बने पनि दलितहरूले कहिल्यै पनि न्याय पाउने अवस्था नबनेको उनले बताए ।

कार्यक्रममा नेकपा (माओवादी केन्द्र)का नेता तेजबहादुर मिजार, कांग्रेसका जिल्ला सभापति मधुप्रसाद आचार्य, एकीकृत समाजवादीका नेता शिवबहादुर देउजा र जिल्ला उपाध्यक्ष वसुन्धरा हुमागाईँले शुभकामनासहितको आफ्नो धारणा राखेका छन् । त्यसक्रममा एकीकृत समाजवादीका अध्यक्ष नेपालले बनेपा नगरपालिका–७ रेडक्रस चोकमा स्थापना गरेको जिल्ला पार्टी कार्यालयको उद्घाटन गरेका छन् ।

फेसबुकबाट तपाइको प्रतिक्रिया

%d bloggers like this: