राष्ट्रपतिद्वारा राजनीतिक दलसम्बन्धी अध्यादेश खारेज

काठमाडौं । राष्ट्रपति विद्यादेवी भण्डारीले राजनीतिक दलसम्बन्धी अध्यादेश खारेज गरेकी छन् । सोमबार बसेको मन्त्रिपरिषद बैठकको सिफारिस बमोजिम राष्ट्रपतिले अध्यादेश खारेज गरेकी हुन् ।

दल विभाजनको व्यवस्था खुकुलो बनाउन सरकारले यो अध्यादेश ल्याएको थियो। अध्यादेश अनुसार एमाले फुटेर नेकपा एकीकृत समाजवादी र जनता समाजवादी विभाजन भइ महन्थ ठाकुरको नेतृत्वमा लोकतान्त्रिक समाजवादी पार्टी नेपाल गठन भएको थियो ।

सोमबार अपरान्ह बसेको मन्त्रिपरिषद बैठकले अध्यादेश खारेजीका लागि राष्ट्रपति समक्ष सिफारिस गरेको थियो । बैठकले केन्द्रीय समिति र संसदीय दल मध्ये कुनै एकमै पनि २० प्रतिशतमा पुगे दल विभाजन हुनसक्ने प्रावधान सहितको अध्यादेश फिर्ता लिन राष्ट्रपतिलाई सिफारिस गरेको थियो ।

मन्त्रिपरिषद् विस्तारका लागि अध्यादेश नै बाधक बनेपछि सरकारले अध्यादेश फिर्ता लिने निर्णय गरेको थियो । अध्यादेश फिर्ताका लागि सत्ता गठबन्धनबाटै प्रधानमन्त्री शेरबहादुर देउवालाई दबाब परेको थियो ।

बिषेशगरी जसपाले अध्यादेश फिर्ता नभए आफ्नो दल फेरि विभाजन हुनसक्ने भन्दै देउवामाथि दबाब दिएको थियो । २० प्रतिशतमा नै दल विभाजन गर्न सक्ने प्रावधान राख्दा दलहरू विभाजनका लागि संधै ढोका खुल्ला भइराख्ने अवस्था थियो ।

फेसबुकबाट तपाइको प्रतिक्रिया

%d bloggers like this: