काठमाडौं । नेत्रविक्रम चन्द विप्लव नेतृत्व नेपाल कम्युनिष्ट पार्टीले सरकारले संसद बोलाएर एमसीसी तत्काल पास गर्ने योजना बनाइरहेको भन्दै आन्दोलनका कार्यक्रम घोषणा गरेको छ ।
शनिबार काठमाडौंमा पत्रकार सम्मेलन गरी पार्टी प्रवक्ता खड्गबहादुर विश्वकर्माले आफ्नो पार्टीले राष्ट्रिय र केन्द्रिकृत रुपमा नेतृत्व प्रदान गर्न एक हप्ते आन्दोलनका कार्यक्रम घोषणा गरेका हुन् ।
उनले एमसीसीको विरोधमा भदौ २८ गते काठमाडौंमा वृहत प्रदर्शन गर्ने जानकारी दिए । उनले सरकारले राष्ट्रघाती एमसीसी पास गरेर कुनै मुर्खता नगरोस् भन्ने आफूहरुले चाहेको बताए ।
उनले तीन/चार वर्षअघि एमसीसीलाई सम्पन्न गर्ने उद्देश्यले अमेरिकी शासक वर्गले चलाएको कार्यक्रम भएको बताए । सबै नेपाली नागरिक यसविरुद्ध आन्दोलित भइरहेको बेलामा पनि सरकार यसलाई पास गराउनेतिर लाग्नु दुर्भाग्य भएको समेत बताए ।
उनले विभिन्न प्रपञ्च रचेर सरकारले एमसीसी पास गर्न लागेको भन्दै यो सम्झौता नेपाली जनता र नेपाल कम्युनिष्ट पार्टीलाई स्वीकार्य नहुने बताए । प्रवक्ता प्रकाण्डले सरकारले यदि मुर्खता नै गरिरहे देशमा आगो लाग्ने चेतावनी दिए ।
एमसीसी मुर्खता गरेर पनि पास गरे देश जल्ने र देशमा आन्दोलनको आगो लाग्ने बताउँदै प्रवक्ता प्रकाण्डले १० वर्ष युद्ध लडेका प्रचण्ड र राणाविरुद्धको आन्दोलनमा काँग्रेसले गर्नुपरेको बलिदानलाई सम्झन प्रधानमन्त्री देउवाको ध्यानाकर्षण गराए ।
