ढुंगेलको संयोजकत्वमा कोरोना महामारी सूचना तथा सहजीकरण केन्द्र स्थापना

काठमाडौं । राष्ट्रिय युवा परिषद्ले कोरोना रोकथाम, नियन्त्रण र उपचार तथा अत्यावश्यक सामग्रीको उपलब्धताबारे समन्वय गर्न कोरोना महामारी सूचना तथा सहजीकरण केन्द्र स्थापना गरेको छ ।
परिषद्ले आइतबार आयोजना गरेको भर्चुअल कार्यक्रममा कार्यकारी उपाध्यक्ष माधव ढुंगेलको संयोजकत्वमा १७ सदस्यीय केन्द्रबारे जानकारी दिइएको हो । केन्द्रमा विभिन्न मन्त्रालयका अधिकारी र विभिन्न सरकारी तथा गैरसरकारी संघसंस्थाका प्रतिनिधि सदस्य रहेका छन् ।
प्रदेश र स्थानीय तहमा समेत संयन्त्र निर्माण गरेर कोरोना महामारीविरुद्ध स्वयंसेवकीय भूमिका निर्वाह गर्ने ढुंगेलले जानकारी दिनुभयो ।
जोखिम मोलेरै महामारीविरुद्ध मैदानमा होमिएको बताउदै बिरामीलाई अस्पताल, औषधि, सावधानीका सम्बन्धमा तत्काल प्रतिक्रिया दिन परिषद्ले चिकित्सकहरूको टोली पनि खटाएको बताउनु भएको छ ।

कोरोना महामारी सूचना तथा सहजीकरण केन्द्रले गर्ने काम

–प्रकोपको रोकथाम र उपचारमा संघ, प्रदेश र स्थानीय सरकारलाई सहजीकरण गर्ने ।
–राष्ट्रिय युवा परिषदमा प्राप्त हुन आएका सूचनाका आधारमा नागरिकको जीवनरक्षाका लागि तत्काल भरमग्दुर पहल गर्ने ।
–अस्पताल तथा अन्य उपचार केन्द्रहरूलाई मेडिकल सामग्री उपलब्ध गराउन प्रयत्न गर्ने ।
–राष्ट्रिय युवा परिषदमा सूचना तथा सञ्चार केन्द्रको सञ्चालन गर्ने ।
–कोभिडको असरले जनजीवनमा पारेको प्रभावलाई न्यूनीकरण गर्न मनोपरामर्श र चिकित्सकीय सेवा उपलब्ध गराउने ।
–प्रकोप रोकथामका लागि सचेतना सामग्री संकलन, उत्पादन, वितरण तथा प्रसारण गर्ने ।
–प्रकोपले पारेको प्रभावको यथार्थ अवस्थाबारे जानकारीका साथ सम्बोधन गर्न फिल्ड अध्ययन गर्ने ।
–औषधि तथा दैनिक अत्यावश्यकीय सामग्रीको खरिद तथा वितरणमा कालोबजारी वा भ्रष्टचार भएको पाइएमा सप्रमाण सरकारी नियामक निकायमा जानकारी गराउने ।
–प्रकोपको रोकथाम र उपचारसँग जोडिएर विकसित घटनाक्रमका आधारमा सम्बोधन गर्न सामुदायिक, निजी र गैरसरकारी क्षेत्रसँग समन्वय तथा सहकार्य गर्ने ।

फेसबुकबाट तपाइको प्रतिक्रिया

%d bloggers like this: