सांसद वली माओवादी प्रवेश गरेपछि मुख्यमन्त्री पोखरेल संकटमा

बुटवल । लुम्बिनी प्रदेशमा एकल बहुमतको सरकार बनाउन मुख्यमन्त्री शंकर पोखरेलको बहुमत नपुग्ने भएको छ । नेकपा एमालेमा रहेकी सांसद विमला कुमारी खत्री(वली) माओवादीमा प्रवेश गरेपछि पोखरेलको बहुमत गुमेको हो ।

खत्रीले दाङ प्रदेशसभा ३ (ख) बाट नेकपाका तर्फबाट चुनाव जितेकी थिइन् । माओवादी र एमाले विभाजन भएपछि उनी कता लाग्ने टुंगो लागेको थिएन । उनी अहिले माओवादीमा प्रवेश गरेपछि पोखरेलसँग बहुमत नपुग्ने देखिएको छ ।

उनले नेकपा माओवादी केन्द्र प्रदेश संसदीय दलका नेता कुलप्रसाद केसीलाई सम्बोधन गरेर पत्र लेख्दै आफू माओवादी केन्द्रमा लागेकी जानकारी गराएकी हुन् ।

उनको पत्रमा सर्वोच्च अदालतको २०७७ फागुन २३ को फैसलाबाट नेकपा पार्टी नरहेकाले आफू नेकपा माओवादी केन्द्र लुम्बिनी प्रदेश सभाको दल सदस्य भइ क्रियाशिल रहन इच्छुक भएकाले सो पार्टीको दलको सदस्य माग गरिएको छ ।

पत्रमा उनले भनेकी छन्, ‘म विमला कुमारी खत्री २०७६ मंसिर १४ गते सम्पन्न भएको उपनिर्वाचनमा नेपाल कम्युनिष्ट पार्टी (नेकपा) को तर्फबाट निर्वाचित क्षेत्र नम्बर दाङ ३ (२) बाट लुम्बिनी प्रदेश सभा सदस्य पदमा निर्वाचित भएको हुँ । नेकपा दुई दलहरु नेकपा एमाले नेकपा माओवादी केन्द्र मिलेर एकता गरेको सबैलाई जानकारी छँदैछ । पछि सर्वोच्च अदालतको फैसलाले नेकपालाई मान्यता नदिइ पुरानै दल कायम गरिदिएको हुनाले म निवाचित भएको दल नरहेको अवस्थामा नेकपा माओवादी केन्द्र दल रोजेको छु । र आजैबाट यस दलको लुम्बिनी प्रदेश सभा दल सदस्य भएको यसै वक्तव्यमार्फत जानकारी गराउन चाहन्छु ।’

नयाँ सरकार गठनका लागि ४१ सांसद चाहिनेमा विमला माओवादीतिर लागेपछि पोखरेलको पक्षमा ४० सांसदमात्रै रहेका छन् ।

फेसबुकबाट तपाइको प्रतिक्रिया

%d bloggers like this: